Feeds:
પોસ્ટો
ટિપ્પણીઓ

251-Sury pan Ugi jashe-સૂર્ય પણ ઊગી જશે

રાત આ ચાલી જશે  સૂર્ય પણ ઊગી જશે,

એમ તારી યાદમાં જિંદગી વીતી જશે.

હોઠ પર આવે છતાં જો યોગ્ય શબ્દો ના મળે,

આંખમાં દેખાય છે, એને હ્રદય સમજી જશે.

સ્નેહ ભીની લાગણીના વૃક્ષને સિંચ્યા કરો,

ફૂલ ફળ તો આવશે ને બાગ પણ ખીલી જશે.

તાઢ તડકો મેઘ તાંડવ પાનખર હો, કે વસંત,

ઈશ્વરી ઘટમાળ માણે એજ તો જીવી જશે.

દર્દ આપે ઐજ તો આપશે એની દવા,

માનવીની આર્તનાદો શિવ પણ પૂછી જશે.

ચાલ, આગળ થા હવે, મંઝિલ થોડી દૂર છે,

છે મિલનની આશ બાકી, સૂર્ય તો ડૂબી જશે.

‘સાજ’ તારી વેદના જો પ્હોંચશે એના સુધી,

કૃષ્ણ તારી વાંસળીમાં પ્રાણને ફૂંકી જશે.

  -‘સાજ’ મેવાડા

       250-To Pan-તો પણ

       250-To Pan-તો પણ

કટલાં વર્ષો ગયાં બેકાર તો પણ,

આપણે છોડ્યો નહીં અધિકાર, તો પણ.

કોઇ વાતે અન્ય પર વિશ્વાસ નો’તો,

ને થયા સંજોગના શિકાર તો પણ.

ના અહં છોડી શક્યા કે વેણ કડવા,

માફ કરતં ના થયો સ્વીકાર તો પણ.

અગ્નિ સાથે ધૃત છે, તો કોણ બચશે?

નાશ બંને, થાય એકાકાર તો પણ.

કેટલાં જોયાં હતાં ભેગા મળીને!

ને થયાં ઘણાં સપનાં સાકાર તો પણ.

જીંદગી એળે ગઇ લાચાર થઇને,

સોચ જૂદી ને હતા સંસ્કાર તો પણ.

‘સાજ’ તૂટ્યે તાલના પકડી શકો, ને-

ભર સભામાં થાય હાહાકાર તો પણ.

  -‘સાજ’ મેવાડા

249-Saval Karvano-સવાલ કરવાનો

249-Saval Karvano-સવાલ કરવાનો

અવનવા એ સવાલ કરવાનો,

ને સભામાં બબાલ કરવાનો.

શ્વાન જવો સ્વભાવ છે એનો,

મોંઢું ચાટીને વ્હાલ કરવાનો.

જે ભરે તગડું બીલ હોટલમાં,

રોડ પર ભાવ-તાલ કરવાનો.

દોસ્ત મારાં દરદને જાણે છે,

વૈદ થઇને ખયાલ કરવાનો.

એ હસીને વિદાય કરશે પણ,

આંસું ભીનો રુમાલ કરવાનો.

લાગણીને ખરીદશે લોકો,

રોકડી તો દલાલ કરવાનો.

પંચ પરમેશ્વર નથી આજે,

કોર્ટમાં જઇ નિકાલ કરવાનો.

સૂર સાથે સુમેળ સાધીને,

‘સાજ’ આજે કમાલ કરવાનો.

  -‘સાજ’ મેવાડા

248-Kaho to Shu Karu-કહો તો શું કરું?

248-Kaho to Shu Karu-કહો તો શું કરું?

મને ધરાર શોધવા કહો તો શું કરું?

તમારું નામ ઠામ પણ ન હો તો શું કરું?

હતા નજદીક, તે છતાં કદી મળ્યા નહીં,

હવે અસીમ વેદમા સહો તો શું કરું?

જનમ ધરી ધરી તમને હું શોધતો રહ્યો,

તમે હવે નકાબમાં રહો તો શું કરું?

સમયનું વ્હેણ જોઇને ડરી ગયા હશો,

તમે પ્રવાહ સાથ ના વહો તો શું કરું?

ન ‘સાજ’ને કહો, ન તાલ સાચવો,

ન રગને સહી શકો, કહો તો શું કરું?

  -‘સાજ’ મેવાડા

         247-Saluni Sanj-સલુણી સાંજ

         247-Saluni Sanj-સલુણી સાંજ

સલુણી સાંજની રંગત હ્રદયનો આવકારો છે,

તમારી ચૂમવા પાની ઘણી લાગી કતારો છે.

ભરી ઉન્માદને શીતળ પવનની લ્હેરખી આવી,

જરા નજદીક આવો તો હુંફાળો શ્વાસ મારો છે.

નથી બાધા ભરો પ્યાલી સુરાહી ના રહે ખાલી,

ઉતાવળ ના કરો સાકી સમય થંભી જનારો છે.

જરા તું રાખ સંભાળી અમારી નાવને માંઝી,

મિલન થઇ જાય મઝધારે હવે તારો સહારો છે.

કહો તો ‘સાજ’ લઇઆવું તમે ગાઓ ગઝલ મારી,

જિવનની મોંજ માણીલો ભલે દુ:ખો હજારો છે.

   -‘સાજ’ મેવાડા

 

246-Samjavtan-Gazal

      246-Samjavtan-Gazal

        સમજાવતાં-ગઝલ

કેટલું થાકી જવાયું, જાતને સમજાવતાં,

વ્રક્ષ જેવું જીવવાની, વાતને સમજાવતાં.

સૂર્ય કાલે ઊગશે નક્કી હતું તો પણ મને,

વાર લાગી એક કાળી રાતને સમજાવતાં.

એ નદીને ખાળવામાં ઊછળીને શું કરે?

વીફર્યાં છે વાદળો દરિયા તને સમજાવતાં.

વેડફી શબ્દો ઘણા બોલ્યા કરું છું એટલે,

થાપ ખાધી મૌનની તાકાતને સમજાવતાં

મધ્ય સપ્તકમાં જ છે આ ‘સાજ’ના સૂરો બધા,

જિંદગી વીતી, તને આ સાતને સમજાવતાં.

            ‘સાજ’ મેવાડા

 

245-TO Saru-Gazal-તો સારું- ગઝલ

         245-To saru-Gazal

            જાયતો સારું ગઝલ

હ્રદય દાઝી ગયું ચોપાસ ઠરતું જાયતો સારું,

નથી વેઠી શકાતું દર્દ શમતું જાયતો સારું.

ફરક પડતો નથી મારે, દિવસ કે રાત છે ક્યારે,

બધી રાતોમાં અંધારું પ્રજળતું જાયતો સારું.

અસાઢી મેઘનો છે ભાર, સ્હેવાતો નથી આજે,                

ભલે આંખો ભરી વાદળ વરસતું જાયતો સારું.

દિલાસો દઇ મને કોઈ હવે ચાલ્યું ગયું છે જો,

હરયની લાગણી મારી સમજતું જાયતો સારું.

મઠારી આપ સાજિંદા હવે આ ‘સાજ’ તૂટ્યું છે,

મધુરા ગીતને છેડી નિખરતું જાયતો સારું.

   -‘સાજ’ મેવાડા

 

244-Satya Ahinshana Sadhak-Nazam

       સત્ય અહિંસાના સાધક-નઝમ

સત્ય અહિંસાના છે સાધક, ગાંધીજી.
પ્રેમ કરુણાના છે શ્રાવક, ગાંધીજી.

અંગ્રેજ હકૂમત સામે ધરણાં કરતા,
નિર્ભય થઇને સૌથી આગળ ધપતા,
ભારત છોડોના અધિનાયક, ગાંધીજી.
સત્ય અહિંસાના…..
દીન, દલિત, દુ:ખી સૌને હ્રદયે રાખ્યા,
સરખા માની હિંદુ મુસ્લિમને  ચાલ્યા,
માનવતાના છે ઉધ્ધારક, ગાંધીજી.
સત્ય અહિંસા….
આઝાદીનો જુવાળ ભરી અંતરમાં.
ધોતી પેરીને ફર્યા દુનિયાભરમાં,
યાદ કરે સૌ લાઠી, ઐનક, ગાંધીજી.
સત્ય અહિંસાના…
આપ્યો છે શાંતિનો સંદેશ નિરંતર
નામ અમર રેવાનું યુગોયુગોન્તર,
સત્ય પ્રયોગોના છે લેખક, ગાંધીજી.
સત્ય અહિંસાના…….


– ‘સાજમેવાડા  17 Nov 2019

 

242-Darvakhat-Gazal-દરવખત 

 242-Darvakhat-Gazal

     દરવખત-ગઝલ

કોઇ સામે નીકળે છે દરવખત,

કેમ છો પૂછી મળે છે દરવખત.

કોઇ કારણ મળતું નથી આ દર્દનું,

આ હ્રદય શાને બળે છે દરવખત?

ચાંદ તો છોડી ગયો છે ક્યારનો,

તોય સાગર ખળભળે છે દરવખત.

ઊંઘ તો વેરી બની તડપાવશે,

સાંજ યાદોમાં ઢળે છે દરવખત.

કોઇ પડછાયો બની પીછો કરે,

દ્વારથી પાછો વળે છે દરવખત.

હોય શબરી કે અહલ્યા આજપણ,

ક્યાં પ્રતીક્ષા ફળે છે દરવખત.

‘સાજ’ તારું કોણ છે જે દૂરથી,

સાદ તારો સાંભળે છે દરવખત.

  -‘સાજ’ મેવાડા

 

 

241-Vihval Hati-Gazal

241-Tu Vihval Hati

કેમ તું વિહ્વવળ હતી

તું પ્રભાતે સૂર્યશી ઝળઝળ હતી,

ને હ્રદયના ફૂલ પર ઝાકળ હતી.

તું વરસતા મેઘશી નિર્મળ હતી,

ને કદી ઝમઝમ કે ગંગા જળ હતી.

સ્હેજ લીધો હાછ મારા હાથમાં,

એ હથેળી કેટલી કોમળ હતી!

શક્યતાની પાર પણ તારું મિલન,

કેટલી અદ્ભૂત એવી પળ હતી.

કેમ આજે શાંત ને ગંભીર છે?

મુગ્ધ કન્યા જેમ તું ચંચળ હતી.

મેં કહી છે આ ગઝલ તારી ઉપર,

કેટલી અણબોટ તું કાગળ હતી.

‘સાજ’ સાથે દર્દ ભર્યા સૂરમાં,

ગીત ગાતી છોકરી વિહ્વળ હતી ?

  -‘સાજ’ મેવાડા

241-Vihval Hati-Gazal-Saaj Mevada