Feeds:
પોસ્ટો
ટિપ્પણીઓ

Archive for ઓક્ટોબર, 2016

162-ગઝલ- શું વળે?

આભમાં તાક્યા કરો તો શું વળે?

જાતને ભૂલ્યા કરો તો શું વળે? 

જિંદગી આખી મળી છે માણવા,

લાશ થઈ જીવ્યા કરો તો શું વળે?

આવશે તો કોઈ રોકી ના શકે,

મોતથી ભાગ્યા કરો તો શું વળે?

જીવતરનો પંથ ભારે અટપટો,

એકલા ચાલ્યા કરો તો શું વળે?

ક્યાં જવું એ ખબર રાખી નહીં,

રાહમાં પૂછયા કરો તો શું વળે?

ચાંદ સાગર સમ અધુરો પ્રેમ છે,

દૂરથી ચાહ્યા કરો તો શું વળે?

સાજસાથે ગીત ગાવું હોયતો,

સમ બધે ચૂક્યા કરો તો શું વળે?

-‘સાજમેવાડા

162-shu-vale-gazal-saaj-mevada

Read Full Post »

161-સ્વીકારવાનું હોય છેગઝલ

ભીખ જેવું માગવાનું હોય છે,

જે મળે સ્વીકારવાનું હોય છે.

એષણાઓ ત્યજવી સહેલી નથી,

એ જ કારણ જીવવાનું હોય છે.

તું નહીં તો કોણ સાથે આવશે?,

એકલા મારે જવાનું હોય છે.

થાય છે મારી દશા સહદેવ સમ,

ક્યાં કશુંયે ભાખવાનું હોય છે.

જોઈ લીધી શક્યતાઓ મેં બધી,

જે બને છે એ થવાનું હોય છે.

ઊંઘમાં ચૂકી ગયો તારું મિલન,

એ પળે તો જાગવાનું હોય છે.

ગીતની સરગમ મધુરી રાખજે,

સાજને તો વાગવાનું હોય છે.

 -‘સાજમેવાડા

 svikarvanu-hoychhe-gazal-saaj-mevada

 

Read Full Post »