Feeds:
પોસ્ટો
ટિપ્પણીઓ

Archive for ઓગસ્ટ, 2018

216-Rahishu-Gazal-Saaj Mevada-રહીશું-ગઝલ

અમેતો તમારા દીવાના રહીશું,

ગમેના તમોને તો છાના રહીશું.

તમે રાહ ચીંધીંને ભૂલી જવાના,

અમેતો તમારા સદાના રહીશું.

ઉડો આભમાં, આ સમય છે તમારો,

અમે પ્રેમથી આ ધરાના રહીશું.

ભલે કોઇ દુશ્મન હશે દોસ્ત મારા,

હ્રદયથી અમેતો બધાના રહીશું.

તમે મૂકશો નામ છેલ્લી કતારે,

અમે તોય અંગત સભાના રહીશું.

તમે ફૂલ જેવા ગુલાબી સુકોમળ,

અમે લઇ સુગંધી હવાના રહીશું.

કરો સૂર ઊંચા તમે “સાજ” કાયમ,

અમેતો ખરજમાં મજાના રહીશું.

-“સાજ” મેવાડા 

 

 

                   

 

Read Full Post »

215B-કારણ જોઈએ-ગઝલ

કોઈ તો લખવાનું કારણ જોઈએ,

છંદ, શબ્દોની મથામણ જોઈએ.

હોય સાક્ષર તોય ગાંડા કાઢશે,

દોઢ ડાહ્યામાંય ડા’પણ જોઈએ.

જીવતરના કોયડા અઘરા નથી,

બળ નહીં, કળથી નિવારણ જોઈએ.

એ વસંતી વાયરો છે, આવશે,

ફૂલ, માળીની ભલામણ જોઈએ.

જીંદગી રંગીન છે, એ માણવા,

એ સમયનો માસ ફાગણ જોઈએ.

કોઈ વાર્તા બે વિના પૂરી નથી,

રામ સામે એક રાવણ જોઈએ.

‘સાજ’ બનશે વાંસળી છેદાઇને,

પ્રાણ તારે ફૂંકવા પણ જોઈએ.

-‘સાજ’ મેવાડા

 

Read Full Post »