238-Sachavi Rakhi-Gazal
સાચવી રાખી-ગઝલ
તમે આકાશની મોટી અટારી સાચવી રાખી,
અમે ઘરની ઉઘાડી એક બારી સાચવી રાખી.
હતું તોફાન મધદરિયે ખલાસી પણ ડરી બેઠો,
અમારી નાવ વિશ્વાસે ઉતારી સાચવી રાખી.
તમે ભૂલી ગયા અમને નથી કૈં દુ:ખ એનું પણ,
અમે તો ઉમ્રભર યાદો તમારી સાચવી રાખી.
તમારા પ્રેમની વાતો અમોને ખોટની લાગી,
અમે ખાતાવહીમાં એ ઉધારી સાચવી રાખી.
ઘણા છોડી ગયા છે દેશ સંબંધો નથી ભૂલ્યા,
વતનની લાગણીને એકધારી સાચવી રાખી.
હતો સંદેહ કૈં એવો હતું ત્યાં જાનનું જોખમ,
નગરના ઘર સુધી એણે કટારી સાચવી રાખી.
જિવનનો જંગ હંમેશાં તમે જીતી ગયા છો ‘સાજ’
બધાયે મોરચે લડતાં ખુમારી સાચવી રાખી.
-‘સાજ’ મેવાડા
Leave a comment