Feeds:
પોસ્ટો
ટિપ્પણીઓ

232-Hovi Ghate-Gazal-હોવી ઘટે

232-Hovi Ghate-Gazal-હોવી ઘટે

જે કહ્યું તે પાળવાની ચીવટે હોવી ઘટે,

કૃષ્ણ તારા આવવાની આહટે હોવી ઘટે.

જો વરસતા હોય બારે મેઘ તારા દેશમાં,

આંગણે મારા ય થોડી વાછટે હોવી ઘટે.

આ વિરહની વેદના સમજી શકેના તો કહું,

ધૈર્યમાં તારી પરીક્ષા સંકટે હોવી ઘટે.

છે ખબર મળશે મને  તારા મિલનની એ જગા,

આખરી જો હોય તો ગંગા તટે હોવી ઘટે.

‘સાજ’ તારા મંદિરે દર્શન વિના ગાતો નથી,

મૂર્તિ ખંડિત હોય તો પણ છેવટે હોવી ઘટે.

 ‘સાજ’ મેવાડા

 

 

 

Advertisements

231-sha kaje-Gazal

       શા કાજે-ગઝલ

બોલ, આવ્યો અહીં તું શા કાજે?

કામ પૂરું કર્યા પછી જાજે.

કોણ છોડે ધરાર દરવાજે,

ઝંખના સોરવાય છે આજે.

રાહ જોયા કરે હજી ગોપી,

કૃષ્ણની બંસરી કદી વાજે.

જો વહે આંસું મેઘલી રાતે,

રાગ મલ્હાર એકલો ગાજે.

જે અમરવેલ જેમ ચૂંસે છે,

દર્દ મેં એક લીધું છે વ્યાજે.

સૂર રુંધાય તે ઘડી સાકી,

‘સાજ’ ને જામ પ્રેમથી પાજે.

‘સાજ મેવાડા’

 

 

 

 

 

230-Sagaie Lage chhe

   સગાઇ લાગે છે-ગઝલ

જન્મભરની સગાઇ લાગે છે,

દર્દ આ વારસાઇ લાગે છે.

છેક ઉંબર સુધી ધસી આવી,

જિંદગી ગુંચવાઇ લાગે છે.

રડવું મારા સ્વભાવમાં નો’તું,

લાગણી ઊભરાઇ લાગે છે.

આ ધુમાડો હજી સતાવે છે,

આગ તો હોલવાઇ લાગે છે.

જો દવા પણ અસર નથી કરતી,

પીડ મારી પરાઇ લાગે છે.

લોક ઝૂમી ઉઠ્યા ગઝલ કે’તાં,

મયકશી માં રચાઇ લાગે છે.

નામ જેનું કદી નથી લીધું,

એ ગઝલ માં સમાઇ લાગે છે.

‘સાજ’ ગાતો રહે જરુરી છે,

રાગિણી તો રિસાઇ લાગે છે.

‘સાજ’  મેવાડા

229-Ek Evi Kal Male-Gazal

               229-Ek evi kal male-Gazal

             એક એવી કળ મળે – ગઝલ

જિંદગીને જીવવાની એક એવી કળ મળે,

હોય વગડો, ખીણ પર્વત,ચાલવાનું બળ મળે.

જે હરણ આવી ગયું છે દોડતું સાગર તટે,

પ્યાસ એની ઠારવાને ક્યાંક મીઠું જળ મળે.

કેમ સર્જનહાર તારા આ જગતના બાગમાં,

હોય છે ફૂલો ઘણા, થોડા વિના પીમળ મળે?

માત્રૃભૂમિ કાજ ખૂદનો જાન ન્યોછાવર કરે,

એમની એ દેશદાઝે મોત પણ ઉજ્જવળ મળે.

સૂરથી સંવાદ સાધે ‘સાજ’ ની આ જિંદગી,

કૈં નહીં તો શબ્દ સાથે અર્થનું અંજળ મળે.

   -‘સાજ’ મેવાડા         25-04-2019

  

      228-Vanchaie Jau Chho – Gazal

             વંચાઇ જાઉં છું – ગઝલ

ખૂલ્લી કિતાબ જેમ હું વંચાઇ જાઉં છું,

છાપે ચડી ગયેલ છું ફેંકાઇ જાઉં છું.

કડવી મળી દવા છતાં ઘોળી ને પી ગયો,

શાને કહો હું દુ:ખથી ઘભરાઇ જાઉં છું.

પ્હોંચી જતે હુંયે કદી મારા મુકામ પર,

રસ્તો બતાવનાર, જો, ફંટાઇ જાઉં છું.

અપરાધ તો કરો તમે,દીધી સજા મને?

સાચે જ હું બેકસૂર છું, દંડાઇ જાઉં છું.

ભોળો હતો, હજીય છું, મૂરખ ગણો નહીં,

હું લાગણી સભર બની, લૂંટાઇ જાઉં છું.

ઉશ્કેરશો કદી મને તો યાદ રાખજો,

ગુસ્સે હવે થતો નથી, ગમખાઇ જાઉં છું.

બેરંગ જિંદગી હવે કોરી રહી નથી,

હું ‘સાજ’ની ગઝલ કહી, રંગાઇ જાઉં છું.

   -‘સાજ’ મેવાડા 17/04/2019

227-સમજાવના – ગઝલ-Samjavna-Gazal

227-સમજાવના – ગઝલ

226-ચોપાસ લાગે-ગઝલ-Chopas Lage-Gazal

226-ચોપાસ લાગે-ગઝલ