Feeds:
પોસ્ટો
ટિપ્પણીઓ

       237-Pachhi Vali Gae Chhe-Gazal

           પાછી વળી ગઇ છે ગઝલ
કદી પાછી વળેના એ હવે પાછી વળી ગઇ છે,
નદી, જે બંધ જોઈને નવા રસ્તે ઢળી ગઇ છે.
નિરખવા ચાંદને સાગર જરા ઊંચો થયો છે ત્યાં,
સરકતી આભમાં કેવી અદેખી વાદળી ગઇ છે.
તને મેં દોસ્ત સમજી ને કરી ‘તી વાત દિલની પણ,
હતી અંગત છતાં આખીય દુનિયા સાંભળી ગઇ છે.
ખિજેતો જાનનું જોખમ, રીઝે તો જાન આપી દે,
હતી સીતા સમી નારી, સમય સાથે ભળી ગઇ છે.
વગાડી ‘સાજ’ સાથે રાસ તું રમતો હતો કાયમ,
વૃંદાવન છોડવા સાથે જ તારી વાંસળી ગઇ છે
.

            -‘સાજ’ મેવાડા    24 July 2019


236-Janam-Maran-Gazal-જન્મ-મરણ-ગઝલ

જન્મ દિવસ હોય એટલે મિત્રો પૂછે,

“કેટલા વરસો થયા?”

જવાબ આપીએ કે, “આટલા”, પણ મનમાં બીજો પશ્ર્ન ઊભો થાય, “હવે કેટલા બાકી રહ્યા?” એનો

જવાબ મળે નહીં, કોઈનેય ના મળે. છતાં એ વાત તો ચોક્કસ છે કે જે મૃત્યું ને અપનાવી લેવા તૈયાર હોય એને અફસોસ કે દુ:ખ ના થાય. જન્મ-મરણ શબ્દો સાથેજ બોલાય છે. મને પણ આવા વિચાર આવ્યા અને  ગઝલ લખાઈ.  

236-Janam-Maran-Gazal-જન્મ-મરણ-ગઝલ

બધી જંજીરને તોડી જવાનો છું,

જગતભરની જફા છોડી જવાનો છું.

વગર સમજ્યે ભરી રાખી હતી એવી,

અહંની માટલી ફોડી જવાનો છું.

વમળ તો હોય ભવસાગરમાં, તેથી શું?

મુકી મઝધારમાં હોડી  જવાનો છું.

જિવનભર રાહ જોઈ છે, હવે એનું,

મિલન થઇ જાય તો દોડી જવાનો છું.

મને જો ઊંઘ આવે તો સુવા દેજો,

રહી છે રાત પણ થોડી,  જવાનો છું.

સકળ સંસારનો આભાર માનીને,

સ્મરીને રામ કર જોડી જવાનો છું.

હવે જચતા નથી આ સૂર સાજિંદા,

બસૂરા ‘સાજને’ છોડી જવાનો છું.

-‘સાજ’ મેવાડા 18 July 2019

 

 વરસાદી રાતની નઝમ


મેઘલો વરસ્યા કરે છે રાતભર,
વીજળી ચમક્યા કરે છે રાતભર.

લોક તો ઊંઘ્યા કરે છે રાતભર.
મોરલા ટહુંક્યા કરે છે રાતભર.

વાયરો કેવી હલાવે ડાળખી,
વૃક્ષ પણ નાચ્યા કરે છે રાતભર.

એક શેરીને અચાનક શું થયું?
જળ ભરી દોડ્યા કરે છે રાતભર.

કોણ આવ્યું પીપળાની આડમાં?
કૃષ્ણને જાપ્યા કરે છે રાતભર.

આ અલૌકિક દ્રશ્ય જોવાદો મને,
ઈશ્ચરી લાગ્યા કરે છે રાતભર.

ઊંઘ આજે ‘સાજ’ ને આવે નહીં,
આભમાં તાક્યા કરે છે રાતભર.
– ‘સાજ’ મેવાડા

234-ગીત/નઝમ – – ભમરા રમતા મેલ્યા તેં
કાજળ કાળી આંખલડીમાં ભમરા રમતા મેલ્યા તેં,
કેમ કરીને ભાગી છૂટવું કેવા નાટક ખેલ્યા તેં.

1-સખી સામટી તાળી પાડે મારી પૂંઠે હસતાં જો,
કાળી આંખો કાળી કામળી કાળી તારી હરકત જો.
ઊભી બજારે દોડી નાઠી કાંટા કંકર ઝેલ્યા મેં,
કેમ કરીને ભાગી છૂટવું કેવા નાટક ખેલ્યા તેં—-
કાજળ કાળી આંખલડીમાં ભમરા રમતા મેલ્યા તેં.

2-રાત અંધારી ઘેરી આંખે સંતા કુકડી રમીયે જી,
વાદે તારી વાંસલડીના હૈડે વાસો કરીયે જી.
જમના કાળી તારે કાંઠે ચરણે આંસું રેલ્યાં મેં,
કેમ કરીને ભાગી છૂટવું કેવા નાટક ખેલ્યા તેં,
કાજળ કાળી આંખલડીમાં ભમરા રમતા મેલ્યા તેં.

3-કોરી આંખો કોરું જીવતર કોરી ચુંદર રાખો મા,
પ્રેમ પછેડી તારી ઓઢી કામણગારી રાતોમાં.
માયા મમતા છોડી જગના જીવન ફેરા ઠેલ્યા મેં,
કેમ કરીને ભાગી છૂટવું કેવા નાટક ખેલ્યા તેં.
કાજળકાળી આંખલડીમાં ભમરા રમતા મેલ્યા તેં.

– ‘સાજ’ મેવાડા              26 June 2019

233-Jo Jo-Gazal-જો જો-ગઝલ

233-Jo Jo-Gazal-જો જો-ગઝલ

મિત્રો,

આ ગઝલના રદીફ સાથે લીધેલા કાફિયા નિભાવવા અઘરા હતા,

કારણ કે મત્લા અનાયાસ ઉતર્યો પણ પછી વ્યાકરણની ભૂલ ના થાય એ ધ્યાનમાં લેવું પડે.

આખરે સફળ થયાનો આનંદ છે.

*‘વાયુ’ છે, એ હવા નથી જો જો,

વ્હાણને ખેડવા નથી જો જો.

ન્યાયને ત્રાજવે વજન મૂકી,

હાથમાં કંપવા  નથી જો જો.

શત્રુ સામે લડી શકો તો પણ,

શેર માથે સવા નથી જો જો.

હઠ કરી પીવડાવશે તમને,

દર્દની એ દવા નથી જો જો.

હોય સાથે બધી મુસીબતમાં,

મિત્ર આજે નવા નથી જો જો.

પી ગયા ઘાટ ઘાટના પાણી,

ઝાંઝવાં પી જવા નથી જો જો.

‘સાજ’ તો ભૈરવી અલગ ગાશે,

રાગ એ મારવા નથી જો જો.

-‘સાજ’ મેવાડા

* ગુજરાતમાં જૂન 2019 માં આવેલું ‘વાયુ’ નામે વાવાઝોડું.

232-Hovi Ghate-Gazal-હોવી ઘટે

232-Hovi Ghate-Gazal-હોવી ઘટે

જે કહ્યું તે પાળવાની ચીવટે હોવી ઘટે,

કૃષ્ણ તારા આવવાની આહટે હોવી ઘટે.

જો વરસતા હોય બારે મેઘ તારા દેશમાં,

આંગણે મારા ય થોડી વાછટે હોવી ઘટે.

આ વિરહની વેદના સમજી શકેના તો કહું,

ધૈર્યમાં તારી પરીક્ષા સંકટે હોવી ઘટે.

છે ખબર મળશે મને  તારા મિલનની એ જગા,

આખરી જો હોય તો ગંગા તટે હોવી ઘટે.

‘સાજ’ તારા મંદિરે દર્શન વિના ગાતો નથી,

મૂર્તિ ખંડિત હોય તો પણ છેવટે હોવી ઘટે.

 ‘સાજ’ મેવાડા

 

 

 

231-sha kaje-Gazal

       શા કાજે-ગઝલ

બોલ, આવ્યો અહીં તું શા કાજે?

કામ પૂરું કર્યા પછી જાજે.

કોણ છોડે ધરાર દરવાજે,

ઝંખના સોરવાય છે આજે.

રાહ જોયા કરે હજી ગોપી,

કૃષ્ણની બંસરી કદી વાજે.

જો વહે આંસું મેઘલી રાતે,

રાગ મલ્હાર એકલો ગાજે.

જે અમરવેલ જેમ ચૂંસે છે,

દર્દ મેં એક લીધું છે વ્યાજે.

સૂર રુંધાય તે ઘડી સાકી,

‘સાજ’ ને જામ પ્રેમથી પાજે.

‘સાજ મેવાડા’