Feeds:
પોસ્ટો
ટિપ્પણીઓ

197-Maro Chhe – (Gazal)-મારો છે

197-Maro Chhe – (Gazal)-મારો છે

હક સજા પર લગાર મારો છે,

જાત પરનો પ્રહાર મારો છે.

મેં જ ખોદી હતી કબર મારી,

એટલે આ મઝાર મારો છે.

નામ પડઘાય તારું ચોપાસે,

આર્તનાદે પુકાર મારો છે.

શોધશો તો જરૂર મળવાનો,

રણ વચાળે તુષાર મારો છે.

એક તારો વિયોગ સાલેતો,

યોગનો પણ વિચાર મારો છે.

એ હસાવે કદી રડાવે પણ,

દર્દ દેનાર યાર મારો છે.

સાત સૂરોના ‘સાજ’માં જાણે,

ઈશ્વરી આવકાર મારો છે.

-‘સાજ’ મેવાડા

 

Advertisements

196-Muktak-મુક્તક-મર્કટ

196-Muktak-મુક્તક-મર્કટ

મન મર્કટ તો માનવ શું છે?

વંશ એનો છે એ પાકું છે;

ઈશ્વર, અલ્લા જીસસ જેવા_

દેવ હશે પણ દાનવ તું છે.

-‘સાજ’ મેવાડા

195 – Angara Jevo-Gazal-અંગારા જેવો

195 – Angara Jevo-Gazal-અંગારા જેવો

કો’ ભઠ્ઠીના ભારા જેવો,

હું તો છું  અંગારા જેવો.

તારી આંખોનો પલકારો,

વિજળીના ઝબકારા જેવો.

દીપ હશે તો ઊંચે ચઢશે,

જીવન પથ ગુબ્બારા જેવો.

મેઘ ગરજતો નીલ આકાશે,

અનંતના  ઈશારા  જેવો.

ફૂલ ઉપર એ ઝાકળ લાગે,

પ્રેમ નદીની ધારા જેવો.

ના સમજો તો કે’વું પડશે,

કોઇ નથી અહીં મારા જેવો.

રાગ રચ્યો છે ‘સાજ’ તમે એ,

નરસિંહ ના કેદારા જેવો.

-‘સાજ’ મેવાડા

  

 

 

 

 

 

194 – Sahelu Nathi-સહેલું નથી-ગઝલ

194 – Sahelu Nathi-સહેલું નથી-ગઝલ

તારા ભરોસે જીંદગી, બોલી ફરું સહેલું નથી,
તું હોય કે ના હોય પણ, ભૂલવું સહેલું નથી.
પાછું તને દેવું જ છે, જેવું મને આપ્યું હતું,
જીવન મને સાંપ્યા પછી, સંભાળવું સહેલું નથી.
મંજિલ તરફની દોડમાં ભૂલો પડ્યો તો શું થશે?
અંધાર ઘેરી રાત છે, ને પહોંચવું સહેલું નથી.
ઉપચાર તો અંતે થશે, જ્યારે થશે ત્યારે થશે,
હમણાં હૃદયના દર્દથી, છૂટી શકું સહેલું નથી.
તું જો નજર મારા તરફ કરતો નથી તો શું થયું,
શ્રધા વગર સંસારમાં જીવી જવું સહેલું નથી.
છંછેડશો જો ‘સાજ’ને, બેસૂર થઇને બોલશે,
સમજી જશો જો શાનમાં, કહેવું બધું સહેલું નથી.

-‘સાજ’ મેવડા

 

193-Jivashe(Gazal)-જીવશે(ગઝલ)

193-Jivashe(Gazal)-જીવશે(ગઝલ)

માનવી જંજાળ સાથે જીવશે,

ને મરણની ફાળ સાથે જીવશે.

ડર હશે ડૂબી જવાનો તે છતાં,

મરજીવો પાતાળ સાથે જીવશે.

માનવી ભોળો હતો બાળક સમો,

ચાંદ જોવા થાળ સાથે જીવશે.

મોતનો આતંક માથે હોય પણ,

મા હશે હેતાળ, સાથે જીવશે.

સાજપર છેડી હશે એણે ગઝલ,

સરગમી સંભાળ સાથે જીવશે.

-‘સાજમેવાડા

   Venunad.wordpress.com

 

 

આજે એક વ્યંગ ગઝલ રજું કરું છું. (ના સમજાયતો મક્તા ફરીથી વાંચશો)

192 – કૂતરો વ્યંગ ગઝલ

આગળ પાછળ છે ફરનારો, જોયો કૂતરો,

દોસ્ત હતો કે દુશ્મન મારો? જોયો કૂતરો.

પીઠ પછાડી છાનો આવી બચકાં ભરતો,

હાથી પાછળ એ ભૂંકનારો, જોયો કૂતરો.

આવે કોઈ જો શેરી નાકે, ભસવા માંડે,

રાત દિવસ કરતો દેકારો, જોયો કૂતરો.

પૂંછ હલાવી પગ ચાટે ને સ્નેહ બતાવે,

જાણે એતો છે નોંધારો, જોયો કૂતરો.

‘સાજ’ તમે કંઈના સમજ્યા એના વાદે,

માણસ જેવો થઈ રે’નારો, જોયો કૂતરો.

‘સાજ’ મેવાડા

 

 

 

191-Jivi Javu-Gazal-જીવી જવું-ગઝલ

191-Jivi Javu-Gazal-જીવી જવું-ગઝલ

શ્વાસ ચાલે ત્યાં સુધી જીવી જવું,

પીંજરેથી તે પછી ઊડી જવું.

જિંદગીનો અર્થ સીધો જાણવા,

જો, કળીને ફૂલ થઇ ફોરી જવું.

જે સમયને સ્થળથી સાપેક્ષ છે,

સત્યને સંજોગથી સમજી જવું.

દે ભલે મિષ્ટાન કળવો લીમડો,

છે ફકીરી કામ ઘોળી પી જવું.

આગ ચાંપે, ઘા કરે તલવારનો.

રામ રાખે મોતને આંબી જવું.

દૂશ્મનીતો કોઈથી કરવી નથી,

જ્યાં મળે પ્રેમ ત્યાં ચાલી જવું.

આવ સર્જનહાર રોકીલે મને,

‘સાજ’નું બેસૂર થઇ ટૂટી જવું.

-‘સાજ’ મેવાડા