Feeds:
પોસ્ટો
ટિપ્પણીઓ

Posts Tagged ‘દોસ્ત’

217-Magya Vagarna Malya Chhe-Nazm

માગ્યાં વગરનાં મળ્યાં છે-નઝમ-‘સાજ’ મેવાડા,

ઘણાં સુખ માગ્યાં વગરનાં મળ્યાં છે,

અને દુ:ખ માંગ્યાં નથી પણ નડ્યાં છે.

ઘણાં દુ:ખ કાયમ પનારે પડ્યાં છે,

અને ખાસ અંગત બની સાંપડયાં છે.

            મટે એક, ત્યાં દુ:ખ બીજું ઉઠે છે,

            હજી કેમ આવા સવાલો ઉઠે છે?

હતા દોસ્ત એવા હ્રદય ઓળખીલે,

ઘડીમાં હસાવે ઘડીમાં લડીલે,

ફરીવાર મળતાં ગળે પણ મળીલે;

મુસીબત હશે ત્યાં બધું સાચવીલે.

            હવે જાન લેવા ઘડીમાં ઉઠે છે,

            હજી કેમ આવા સવાલો ઉઠે છે?

ઘણાંના દરદને મટાડી શક્યો છું,

મળ્યું માન મોભો, પચાવી શક્યો છું,

સમયના ઇશારા હું પરખી શક્યો છું;

અને જીવતરને હું માણી શક્યો છું.

            કસક એક શાની હ્રદયમાં ઉઠે છે,

            હજી કેમ આવા સવાલો ઉઠે છે?

ભલે ‘સાજ’નું આ ફકીરી જીવન છે,

વિના હેમનું આ અમીરી જીવન છે,

નિજાનંદ સાથે કબીરી જીવન છે;

રહી છે ખુદ્દારી ખમીરી જીવન છે.

            છતાં ઊંઘમાં કેમ ચીખી ઉઠે છે,

            હજી કેમ આવા સવાલો ઉઠે છે?

 ‘સાજ’ મેવાડા  venunad.wordpress.com

 

 

 

 

 

 

 

 

 

Advertisements

Read Full Post »

222-Dard ae Aakhar taru thayu

જે કદી મારું હતું, તારું પણ આખર થયું,

દદૅના સંબંધમાં એટલું સરભર થયું.

કેટલા જન્મો હશે કેટલી આરાધના,

ફૂલ સાથે એ પછી કંટકોનું ઘર થયું.

જન્મ પંખીનો પ્રભું મુક્ત તેં આપ્યો હતો,

કોણ જાણે કેમ આકાશનું પિંજર થયું?

કેમ વીતી જીંદગી? દોસ્ત ના પૂછો મને,

ભાર લઇને પ્હાડ પર દોડવું દુશ્કર થયું.

છે કરામત ઈશની, કોણ એ સમજી શકે!

આમ જોવા જાવતો, ‘સાજ’નું ઘડતર થયું.

-‘સાજ’ મેવાડા             06/11/2018

 

 

 

Read Full Post »

216-Rahishu-Gazal-Saaj Mevada-રહીશું-ગઝલ

અમેતો તમારા દીવાના રહીશું,

ગમેના તમોને તો છાના રહીશું.

તમે રાહ ચીંધીંને ભૂલી જવાના,

અમેતો તમારા સદાના રહીશું.

ઉડો આભમાં, આ સમય છે તમારો,

અમે પ્રેમથી આ ધરાના રહીશું.

ભલે કોઇ દુશ્મન હશે દોસ્ત મારા,

હ્રદયથી અમેતો બધાના રહીશું.

તમે મૂકશો નામ છેલ્લી કતારે,

અમે તોય અંગત સભાના રહીશું.

તમે ફૂલ જેવા ગુલાબી સુકોમળ,

અમે લઇ સુગંધી હવાના રહીશું.

કરો સૂર ઊંચા તમે “સાજ” કાયમ,

અમેતો ખરજમાં મજાના રહીશું.

-“સાજ” મેવાડા 

 

 

                   

 

Read Full Post »

        212-Maunma-Gazal

            મૌનમાં-ગઝલ

એ હવે વાતો કરે છે મૌનમાં,                       

જાતને એ શું કહે છે મૌનમાં.

વેદના દિલની સતાવી જાય તો,

વૈદની ગોળી ગળે છે, મૌનમાં.

એ કબૂલી જાય છે, એના ગુના,

આંખ ઢાળીને રડે છે, મૌનમાં.

જન્મથી ગુલામ છે, એ કાળનો,

કેટલા જખ્મો ખમે છે, મૌનમાં.

છોડવા, ઘોંઘાટને આ શ્હેરના,

ગામને રસ્તે વળે છે, મૌનમાં.

વાત મનની જાણનારો કોઇ છે,

સાંભળી ભોંઠો પડે છે, મૌનમાં.

દોસ્તને પૂછ્યા વગર ચાલે નહીં,

‘સાજ’ તું શાને રહે છે મૌનમાં?

 -‘સાજ’ મેવાડા

 

 

Read Full Post »

આજે એક વ્યંગ ગઝલ રજું કરું છું. (ના સમજાયતો મક્તા ફરીથી વાંચશો)

192 – કૂતરો વ્યંગ ગઝલ

આગળ પાછળ છે ફરનારો, જોયો કૂતરો,

દોસ્ત હતો કે દુશ્મન મારો? જોયો કૂતરો.

પીઠ પછાડી છાનો આવી બચકાં ભરતો,

હાથી પાછળ એ ભૂંકનારો, જોયો કૂતરો.

આવે કોઈ જો શેરી નાકે, ભસવા માંડે,

રાત દિવસ કરતો દેકારો, જોયો કૂતરો.

પૂંછ હલાવી પગ ચાટે ને સ્નેહ બતાવે,

જાણે એતો છે નોંધારો, જોયો કૂતરો.

‘સાજ’ તમે કંઈના સમજ્યા એના વાદે,

માણસ જેવો થઈ રે’નારો, જોયો કૂતરો.

‘સાજ’ મેવાડા

 

 

 

Read Full Post »