Feeds:
પોસ્ટો
ટિપ્પણીઓ

Posts Tagged ‘ભરોસો’

211-Kayar Dari Janara-Gazal-Gazal-Saaj Mevada211-Kayar Dari Janara-Gazal

         કાચર ડરી જનારા-ગઝલ

 સંહારના જીવનને, કાયર ડરી જનારા,

જોયા કદી, અકાળે ફૂલો ખરી જનારા?

એ જ્ઞાનપીઠ ખોલે, ને ટંકશાળ માને,

માસુમ બાળકોના જીવન હરી જનારા.

છે જીંદગી તમારી દુર્લભ કિતાબ જેવી,

પૃષ્ઠો તમેજ કાપી, પસ્તી કરી જનારા.

ના આવ મયકદામાં, સાકી સજી-ધજીને,

બેફામ પી મરે છે, જામો ભરી જનારા.

મજનુ હતો કહો છો, ફરહાદ પણ હતો ને?

પામ્યા નથી કશુંયે, પ્રેમી મરી જનારા.

શ્રધ્ધા નથી પ્રભું પર, ના જાત પર ભરોસો,

ડૂબી ગયા કિનારે, સાગર તરી જનારા.

આ ‘સાજ’તો ગઝલમાં છેડી ગયો દરદને,

ના થઇ અસર તને કંઇ પાછા ફરી જનારા.

    –‘સાજ’ મેવાડા    10 June 2018.

 

Advertisements

Read Full Post »

195-Tano madhuri hoya Che-Gazal-વાગું નહીઁ ગઝલ

રોજ તારે દ્વાર આવી ભીખ હું માગું નહીં,

છે ભરોસો જાત પર તો નર્ક પણ ત્યાગું નહીં.

જન્મથી ભરપૂર છું, શ્રીમંત હું લાગું નહીં,

તેં મને આપ્યું ઘણું એથી વધું માગું નહીં.

એ હવે આવી ચડે છે રોજ મારા સ્વપ્નમાં,

એટલે તો રાતભર હું સહેજ પણ જાગું નહીં.

હું કદી ના અવગણું ઈચ્છા નિયંતાની હવે,

જે દિધા તે દર્દથી ગભરાઈને ભાગું નહીં.

નામ મારું થઇ જશે જો સાથ તું દેશે મને,

એકલો હું ‘સાજ’ છું, તારા વગર વાગું નહીં.

  -‘સાજ’ મેવાડા

Read Full Post »

194 – Sahelu Nathi-સહેલું નથી-ગઝલ

તારા ભરોસે જીંદગી, બોલી ફરું સહેલું નથી,
તું હોય કે ના હોય પણ, ભૂલવું સહેલું નથી.
પાછું તને દેવું જ છે, જેવું મને આપ્યું હતું,
જીવન મને સાંપ્યા પછી, સંભાળવું સહેલું નથી.
મંજિલ તરફની દોડમાં ભૂલો પડ્યો તો શું થશે?
અંધાર ઘેરી રાત છે, ને પહોંચવું સહેલું નથી.
ઉપચાર તો અંતે થશે, જ્યારે થશે ત્યારે થશે,
હમણાં હૃદયના દર્દથી, છૂટી શકું સહેલું નથી.
તું જો નજર મારા તરફ કરતો નથી તો શું થયું,
શ્રધા વગર સંસારમાં જીવી જવું સહેલું નથી.
છંછેડશો જો ‘સાજ’ને, બેસૂર થઇને બોલશે,
સમજી જશો જો શાનમાં, કહેવું બધું સહેલું નથી.

-‘સાજ’ મેવડા

 

Read Full Post »

186-રાખું છું-ગઝલ
ધર્મની આગવી દીવાલ રાખું છું,
આ તિલક ખાસ મારે ભાલ રાખું છું.
ઘાવ ઊંડા કરે છે લોક દુનિયાના,
વારને ખાળવાને ઢાલ રાખું છું.
હોય મઝધારમાં ડૂબી જવાનો ડર,
નાખૂદા પર ભરોસો હાલ રાખું છું.
યાદ એની હ્રદયના શૂળ જેવી છે,
વેદનાની દવા તત્કાલ રાખું છું.
ભૂલ મારી કદી થઇ જાય ત્યારે હું,
ગાલ પર દઇ તમાચો લાલ રાખું છું.
‘સાજ’ મક્તા કહે પણ દાદ ના દેશો,
ના મળ્યો શબ્દતો ગાગાલ રાખું છું.
-‘સાજ’ મેવાડા

Read Full Post »

 

મિત્રો,
આ સોનેટ, ગઝલના છંદમાં લખાયું છે.(Shakespearian style). આમાં ઉપયોગમાં લીધેલા દિવંગત અને હયાત કવિઓની ક્ષમા યાચના સાથે રજુ કરું છું. આપની સલાહ કે સુચન હોયતો જરુરથી જણાવશો, શક્ય લાગશે તો સુધારણાનો અવકાશ છે જ.
184-સોનેટ-ગઝલ
(Shakespearian Sonnet in Gazal)
નામ એનું સખી લખી નાખે,
કલ્પના હોય ઉર્વશીવરની;
કોઇ તો નામ સાચુંયે નાખે,
કોણ છે એ દરેક શાયરની?

જો, સુ.જો.ની મૃલાણ છે સુંદર,
કોઇ લીલા સદાય રાંદેરી;
એક સોનલ રમેશની દિલબર,
તો જવાહર કહે ફના દર્દેરી.

જીંદગીભર રહી તડપ મારી,
સુર્યમુખી સમો બની તારો;
રોજ ઝૂકી ગઈ નજર મારી,
સ્રોત ઊર્જા-ઉજાસ તું મારો.

આમતો સૂર્ય છે નજર સામે,
‘સાજ’નો પ્રેમ છે કૃષ્ણ નામે.
-‘સાજ’ મેવાડા

184-Sonnet-gazal-Saaj Mevada

 

 

Read Full Post »

179-જંતર બને-(ગઝલ)

લાગણીમાં બોજ આ ભણતર બને,

એજ બુધ્ધિ દિલનું જો કળતર બને.

ના રહે એનો ભરોસો કોઇને,

હોય અંગત તે છતાં નડતર બને.

જિંદગી જીવી જવાનું મોંજથી,

ખેતરો ખેડ્યા વિના પડતર બને.

સત્ય આખર જૂઠથી જીતી જશે.

એ સનાતન સંત નો ઉત્તર બને.

એ જ છે કરતાર તોયે શું કરે?

એક ખંજર એકતો બખ્તર બને.

ઓ હ્રદય કચડાઇજા આનંદથી,

ફૂલ પીસાયા પછી અત્તર બને.

રાગ ભૈરવ છેડતોના ‘સાજ’ તું,

પ્રેમનું તારું કદી જંતર બને.

  ‘સાજ’ મેવાડા

 

Read Full Post »

     137 – ગઝલતૈયાર છું

જાત પર રાખી ભરોસો, જીતવા તૈયાર છું,

પાનખર નું વૃક્ષ છું પણ ફોરવા તૈયાર છું.

દુઃખ દુનિયાના કહો કે નર્કના, સરખા હશે,

બાથ ભીડી મોતને પડકારવા તૈયાર છું.

છે ખબર આંધી તણી, તોયે સફર છોડું નહીં,

નાવ છોડી એ વમળમાં ખેલવા તૈયાર છું.

દૂર રહીને મોકલે છે, આંસુંઓ કેવાં મને,

તું મને ભૂલી શકે તો, ભૂલવા તૈયાર છું.

કૃષ્ણ આવે ના ફરી, પણ હું કદી આવી શકું,

વ્રજ ને ગોકુળમાં હું જન્મવા તૈયાર છું.

છો નિરાકારી અગોચર! કોઇ ના દેખે તને,

બંધ આંખે તારી મૂરત સર્જવા તૈયાર છું.

‘સાજ’ નામે દાસ તારો, ઓળખી લે જે મને,

ચાંદ તારા લઇ તને હું પોંખવા તૈયાર છું.

–     સાજમેવાડા

137-Taiyaar Chhoo-Gazal

Read Full Post »

Older Posts »