Feeds:
પોસ્ટો
ટિપ્પણીઓ

Posts Tagged ‘સાગર’

    166-નહીં શકુંગઝલ

લાગણી દિલમાં છુપાવી નહીં શકું,

વાતમાં પણ વાત લાવી નહીં શકું.

કેમ વારંવાર મન શોધે તને?

એ જ કારણ હું બતાવી નહીં શકું.

કોયલાનો વંશ છું, પણ આખરે,

હીર મારું હું ગુમાવી નહીં શકું.

છે ફકીરી વેશ મારો, ચાલશે?

મહેલમાં તારા હું આવી નહીં શકું.

છું ભલે સાગર સમો હુંસાજ’, પણ,

સ્વર્ગની ગંગા સમાવી નહીં શકું.

-‘સાજમેવાડા

166-nahi-shaku-gazal

Advertisements

Read Full Post »

165-જોડી નાખવાની-ગઝલ

સત્ય સાથે વાત જોડી નાખવાની,

ના રહે કારણ વખોડી નાખવાની.

જીવતરને ઝેર કરનારા મળે તો,

ગાંઠ સંબંધોની છોડી નાખવાની.

માનવીએ ભૂલથી આડી ચણેલી,

ધર્મની દીવાલ તોડી નાખવાની.

છેતરો ભગવાનને પણ ભક્ત થઈને,

આરતીમાં એક કોડી નાખવાની.

ભેદ રાવણ રામનો સમજી શકેના,

ડોક પોપટની મરોડી નાખવાની.

છે નશાથી ચૂર તારી આ નજર તો,

રોજ મારે જામ થોડી નાખવાની.

‘સાજ’ સાગર પાર કરવો હોય ત્યારે,

ના ડરો મઝધાર હોડી નાખવાની.

-‘સાજ’ મેવાડા

 165-jodi-nakhavaani-gazal-saaj-mevada

 

Read Full Post »

162-ગઝલ- શું વળે?

આભમાં તાક્યા કરો તો શું વળે?

જાતને ભૂલ્યા કરો તો શું વળે? 

જિંદગી આખી મળી છે માણવા,

લાશ થઈ જીવ્યા કરો તો શું વળે?

આવશે તો કોઈ રોકી ના શકે,

મોતથી ભાગ્યા કરો તો શું વળે?

જીવતરનો પંથ ભારે અટપટો,

એકલા ચાલ્યા કરો તો શું વળે?

ક્યાં જવું એ ખબર રાખી નહીં,

રાહમાં પૂછયા કરો તો શું વળે?

ચાંદ સાગર સમ અધુરો પ્રેમ છે,

દૂરથી ચાહ્યા કરો તો શું વળે?

સાજસાથે ગીત ગાવું હોયતો,

સમ બધે ચૂક્યા કરો તો શું વળે?

-‘સાજમેવાડા

162-shu-vale-gazal-saaj-mevada

Read Full Post »

મારે કાનાનું નામ નથી લેવું.

Dwarka from Reliance Road

મારે મીઠાપુર સાથે દ્વારિકાને છોડવાનો સમય નજીક છે ત્યારે અંતરમાં અવનવી વેદના અનુભવાય છે. ખાસતો મારા આરાધ્ય દેવાધિદેવ ભગવાન શ્રી દ્વારિકાધીશને, મારા કાળીયા ઠાકોરેને છોડીને દૂર વસવું પડશે એની વેદના ઘણી છે. આવા ભાવાવેશમાં આ રચના થઈ છે. આપ ભાવિકોને પણ ગમશે અને કંઈક અંશે થોડી વિરહ વેદના પણ અનુભવાય તો મારો પ્રયત્ન સફળ થયો છે. બાકી પ્રભુપ્રેમની સામે કશુંય ના ટકે, જોજનો દૂર રહીને પણ એ અનુભવાય.

મારે કાનાનું નામ નથી લેવું,

ભલે રાતભર જાગીને રોવું.

પ્રેમે પરખ્યોતો એને વૃજની કુંજમાં,

રાસ રમ્યો તો સાથે વેણુની ધૂનમાં,

નથી કાળીયા ઠાકોરને કંઈ કહેવું….મારે.

તારો હુંકમ હું આજ માથે ચડાવું,

દર્શનને કાજે હરિ ધામ તારે આવું,

અંતે સાગરમાં મારે સમાવું….મારે.

ચરણે પડીને ‘સાજ’ વિનવે છે નાથને,

નંદજીના લાલ ના છોડો મારા હાથને,

ભવભવના બંધન કેમ તોડું….મારા.

‘સાજ’ મેવાડા

૧૦મી જુલાઈ ૨૦૧૧.

 

Read Full Post »

Landscape Water colour by Dr. P. A. Mevada

“ચિત્રલેખા” જૂન ૨૭, ૨૦૧૧ ના અંકમાં ‘ઝલક” કોલમ અંતર્ગત શ્રી સુરેશ દલાલનો લેખ, “ ઝૂરવું ગમે એવી મૌસમ” વાંચતાં અનુભવેલા ભાવ પ્રસ્તુત રચનામાં નિરૂપાયા છે. 

‘ઝુરવું’ એ ફક્ત ક્રિયાપદ નથી, કે ઝૂરાપો એ શબ્દજ નથી. તે એક સંપૂર્ણ વાક્ય છે, એક સંપૂર્ણ કવિતા છે, એ સંપૂર્ણ રીતે ભાવને ચિત્ર રૂપે આપણા માનસપટ ઉપર ઉપસાવે છે. 

‘હરિ-ઝૂરાપો’ એ હરિને મળવાની તિવ્ર ઉત્કંઠા છે. આને મેં ઝરણું થઈને વહેતી નદીનું રૂપ કલ્પ્યું છે. જેમ નદી કંઈ કેટલાય અવરોધોને (સુખ-દુઃખને), પાર કરતી સાગરમાં ભળી જાય છે એમ હરિ મારા ઝૂરાપાને, મને અનંત સાગર રૂપે, પોતાનામાં એક અંગ (એકાંગ) કરી સમાવી લેશે. પછી મારુ અસ્તિત્વ નહીં રહે. 

હરિ-ઝૂરાપો

હરિ-ઝૂરાપો ઝરણું થઈને વહેતો,

ઝરણે ઝરણે જમુના થઈને,

વ્રજભૂમિમાં ફરતો….હરિ-ઝૂરાપો.

 

કાદવ આવે કંકર આવે,

ખિણ આવે કે પર્વત આવે,

અનંત ભણી ખળખળતો…. હરિ-ઝૂરાપો.

 

વિહંગ સૂરે રાગ છેડીને,

તરુવર ખડને કાંઠે ધરીને,

વનમાળીની વાતો…. હરિ-ઝૂરાપો.

 

મીન મગરને કછુઆ ભેળો,

નાવ ભરીને માનવ મેળો,

ધરણીધરને ગાતો…. હરિ-ઝૂરાપો.

 

હરિ-સાગર છે સ્વામી મારો,

ઊછળી કરશે સ્વાગત એવો,

‘સાજ’ એકાંગે મળતો…. હરિ-ઝૂરાપો.

‘સાજ’ મેવાડા

Read Full Post »

એવી માન્યતા છે કે શ્રીહરિ કૃષ્ણને રાધાજીની કૃપાથી જલ્દી પામી શકાય છે. અને આત્માએ રાધા છે અને પરમાત્મામાંથી વિખુટો પડેલો એ અંશ-આત્મા પોતાના મૂળને પામવા સદા તડપતો રહે છે. સાગરના પાણી વરાળ રુપે થઈને વરસાદ, ઝરણાં અને નદી વાટે થઈને અંતે સાગરમાં જ ભળી જાય છે ને?

આજ વાત મેં મારા તા. ૧૮ ડિસેમ્બેર ૨૦૦૯, પોષ્ટ ન. ૧૯. માં જરા જુદી રીતે કહી છે.

ચાંદો સુરજ દિશે અવિચળ તોયે,

તારાએ એક દિ ખરવાનું,

નીચે પાણીને ઊપર વાદળ એમ,

આતમ નુ રૂપ એક જાણું,મારે આગળ એકલા જવાનું.

 

રાધા

વૃષભાનુની છોરી રાધા બરસાણાને છોડી,

કૃષ્ણ કૃષ્ણ રટતી રાધા ગોકુળ આવે દોડી.

નંદને ઘેર આવી રાધા જશોદાજીને બોલી,

ક્યાં છે (ત)મારો કાનકુંવર હું થાકી ખોળી ખોળી.

કોઈ કહે છે ઘેલી રાધા કોઈ કહેછે ભોળી,

કૃષ્ણ કેવો કાળો કાળો રાધા ગોરી ગોરી.

મોરપીંછની પાઘ પે’રી કાળી કામળ ઓઢી,

વેણુવાજે ત્રિભંગ મૂરત ગોવાળોની ટોળી.

હરિ દર્શન કાજે રાધા દ્વાર દેશે ખોલી,

ભક્તોનો આતમ છે રાધા “સાજ” કહે કર જોડી.

રાગ – ભુપાલી, માલકૌંશ

સાજમેવાડા

Read Full Post »