26 June 2015 (126) આથમી જાય છે – (ગઝલ)
સુર્ય ઊગી આથમી પણ જાય છે,
ચાંદ તારા એપછી પરખાય છે.
આબરૂ ઊંચી હતી તારી ભલે,
એક કીધી ભૂલ ત્યાં ચર્ચાય છે.
રોપશોના તૂલસી ઘર આંગણે,
સિંચનારા જ્યાં નથી કરમાય છે.
હોય જ્ઞાની તે કદી બોલે નહીં,
છે અધુરો તે ઘડો છલકાય છે.
લોક તમને સહેજમાં ભૂલી જશે,
વ્હેલું મોંડુ એ હવે સમજાય છે.
હસ્તરેખા ના કદી વંચાવશો,
બંધ મૂઠી લાખની સચવાય છે.
નસ્લ જાણીને ગઝલ કે‘તો હશે,
‘સાજ‘! એ શાયર બધે વખણાય છે.
-‘સાજ‘ મેવાડા