બે ગીતનો સમનવ્યય કરીને આ ‘રાસ’

મિત્રો,

મારા બે ગીતનો સમનવ્યય કરીને આ ‘રાસ’ નું રેકોર્ડીંગ થયું છે.

છંદમાં-

મોહન મારું મનડું તારું નામ અહર્નિશ જપતું,

વેણુનાદે મગન થઈને ભાન ભૂલી થનગનતું.

ગોવર્ધનના શિખર પરએ નૃત્ય કરી વિચરતું,

મોર બનીને ટહૂકે ટહૂકે મોહન મોહન જપતું.

રાસ ગીત- કાનો મારો રુઠ્યો રિસાયો કવેણ..

સખી મને ઘડીએ ના આવે ચેન,

કાનો મારો રુઠ્યો રિસાયો કવેણ.

જશોદાજી ગોરા ને ગોરા છે નંદ,

મેઘલી રાત સમું કાળું તારું અંગ,

સહેજ કીધું કાના તું ગોરો નથી કેમ?…..કાનો મારો.

માખણની ચોરી કરે વર્તાવે કેર,

નંદ ઘેર ભર્યા છે માખણના ઢેર,

સહેજ કીધું કાના તું ચોરી કરે કેમ?…..કાનો મારો.

વેરણ મારી રાતડી ને ભલે થાયે ભોર,

વેણુની ધૂન વાજે આઠે પહોર,

સહેજ કીધું કાના તું વહાલો લાગે કેમ?…….કાનો મારો.

બાંય ઝાલી હૈયે લીધી પ્રેમ ભરે નેણ,

કાનમાં કીધા મને મીઠામધ વેણ,

‘સાજ’ના સ્વામી તને જાણ્યો નહીં કેમ?……કાનો મારો.

છંદ,

રાસ રચ્યો તેં નભ મંડળમાં કેવી કરે રમઝટ તું,

વ્રજ નારી રાધાને પગલે ઝાંઝર થઈ ઝળઝણતું.

જમના જળમાં સ્નાન કરીને ફૂલ ખીલ્યું મઘમઘતું,

‘સાજ’ને ભક્તોની સંગે મનમોહન તને ગમતું.

રચયિતા- ‘સાજ’ મેવાડા

ગાયક- નિલેશ પરમાર, તબલા-હિમાંશું ગગલાની,

સંગીત-અજીતભાઈ, કલહંશભાઈ, રેકોર્ડિસ્ટ-દિવ્યાંગ

Read Full Post »

88…એના હૈયામાં રાજ કરે રાધા.

88…એના હૈયામાં રાજ કરે રાધા.

માનનિય બ્લોગ મિત્રો,

દ્વારિકામાં જઈ વસેલા શ્રી કૃષ્ણ બધી સુખ-સાહ્યબીમાં રહેવા છતાં ગોકુળનું બાળપણ અને એમની પ્રિય સખી રાધાને ભૂલ્યા નથી. રાધાજીના પ્રેમ અને વિરહ ઉપર ઘણી રચનાઓ થઈ છે પણ શ્યામ, દ્વારકાના નાથ, રાજાધિરાજની વેદનાની વાતો ઓછી થઈ છે. મેં આ રચનામાં પ્રયત્ન કર્યો છે કંઈક એવો ભાવ રજુ કરવામાં. જોકે હું સંપુર્ણ સફળ થયો નથી, એ દેખાઈ આવશે!

‘સાજ’ મેવાડા

“જેઓ છૂટાં પડી શકે તે બીજા ગમે તે હોય, રાધા અને કૃષ્ણ તો નહીં જ”

–ગુણવંત શાહ ( કૃષ્ણં શરણં ગચ્છામિ માંથી )

****************************************************

…એના હૈયામાં રાજ કરે રાધા.

દ્વારકાનો નાથ મારો રાજાધિરાજ, એના હૈયામાં રાજ કરે રાધા,

હિરના હિંડોળે રુકિમણી ઝૂલાવે, એના હૈયાના ઝૂલે, ઝૂલે રાધા.

દ્વારકાના મહેલમાં યાદ આવે રાધાતો, કનક થાળીને દૂર ઠેલતા,

વગડામાં બેસી એણે રાધાના હાથથી, માખણ મિસરી છે ઘણા ખાધા.

પારિજાત ફૂલ રુકિમણીને પ્રેમથી, નારદની ભેટ ગણી આપતા,

સખી રાધાના વિખરેલા કેશમાં, કેવાં વેણીમાં ફૂલ ગૂંથતા?

રાધાને શ્યામ કદી જૂદા ના હોય ‘સાજ’, ગોકુળીયુ હોય કે દ્વારકા,

જન્મારે જન્મારે રાધાને શ્યામ તો, ભક્તોની આર્ત સુણી આવતા.

-‘સાજ’ મેવાડા

Read Full Post »

86-GOPI BHAVA- ગોપીભાવ By Saaj Mevada

નવી રચના થાય ત્યાં સુધી, મારા આ બ્લોગની રચનાઓમાંની  થોડી પંક્તિઓ માણો.

________________________________________________________

ગોપી ગોવાળ તારા વ્યાકુળ થઈ શોધે છે,

ને ગોકુળિયુ દિસે સુમસામ, વેણુ વગાડોને શ્યામ!

                *****

ગોકુળ છોડીને ભૂલ્યો તુ કાન મને,

ઝરુખે ઝુકીને નિરખી જો, દ્વારિકાના નાથ મને ઓળખી જો!

                *****

કોણ રે વગાડે ‘સાજ’ બેસુરા નાદમાં,

રાસ ભૂલી વ્રજનાર ગાયનના વાદમાં,

રોતી રાધાને વેણુ તારી વરવી છે,

મારે મનડાની વાત એક કહેવી છે.

                *****

તારા ભક્તોને કાજ આવીને એક દિ,

બંશરીની ધૂનો સંભળાય તું,

અંતરે રાખી ‘સાજ’ નિશદિન ધ્યાન ધરે,

દર્શન વિનાનું જાય આયખુ.

                *****

‘સાજ’ કહે ચરણે પડી, ભવનો ભરથાર મારો,

પ્રેમે વરી કાનજી છે.

                *****

નિશદિન તડપે મન એને જોવા,

કૃષ્ણ કહાનડાને ચાહે તે વરવા,

‘સાજ’ના સ્વામીને એટલું કહેજો,

છોડેના મારો હાથ, બેની હું કેમ કરુ કા’ન કેરી વાત!

                *****

‘સાજ’ના સ્વામીને દેજો સંદેશો સખી,

મિલનની આશે જોઉં વાટડી,

વિરહની વેદનામાં ભવ કેમ જાય સખી,

નિર વિના જેમ વેલ-પાંખડી.

                *****

નટખટ તે નંદલાલ રાજાધિરાજ છે,

ભૂલ્યો છે ‘સાજ’ કદી ભૂલ્યોના નાથ છે,

સાદ કરે સપનામાં દોડી આવુ!

                *****

‘સાજ’ કહે સ્વામી મારો શ્યામ બીજો હોયના,

ચરણોમાં શિશ ધરું ભવ એળે જાયના!

                *****

મેંતો મિંઢળ બાંધું છે તારા નામનું,

કોઈ પૂછે તો કે’શું મારા શ્યામનું!

                *****

ના માને તું લોક ના જાણે,

હરિને દીધું છે મારું ચિત્ત,

સખી મ્હારે શામળિયાશુ પ્રિત.

                *****

સખી મને ઘડીએ ના આવે ચેન,

કા’નો મારો રુઠ્યો રિસાયો કવેણ.

                *****

શિર ચરણે ધરીને ‘સાજ’ વિનવે હરિ,

પ્રભુ આવશો ક્યારે મારે નેસડે ફરી….!

                *****

રોમ રોમ ઝંખે તને તડપે છે ‘સાજ’ રોઈ,

સાજિંદો શ્યામ મારો છેડે જો રાગ કોઈ,

તારી બંશરી બનીને હું આવું શામળિયા,

હોઠે ધરે તો હું ગાઉં……!

*****

છેલ્લું ચરણ ભરી ‘સાજ’ કહી દેવું છે,

અંતે આવી દ્વારિકામાં સમાઈ જાવું છે,

શામળિયા તારા પ્રેમમાં લૂંટાઈ જાવું છે.

                *****

Read Full Post »

83-Radhe-Krishna-Dhun-રાધે કૃષ્ણ ધૂન

ઘણા વખત પછી એક નવી ભક્તિ રચના રજુ કરું છુ. ઘણા પ્રયત્નો કરવા છતાંયે મન ગોકુળ, ગોવર્ધન, ગોપ-ગોપીઓ, કાલિંદી ઘાટ, અને વૃજના કૃષ્ણને ભૂલતું નથી. એમને છોડીને ક્યાં જવું?

83-Radhe-Krishna-Dhun-રાધે કૃષ્ણ ધૂન

કૃષ્ણ કહેતાં દ્વારિકાને, રાધા કહેતાં વૃજ,

યાદ કરીને પાવન થઈએ, પ્રેમ-ભક્તિને રંગ,

બોલો રાધે કૃષ્ણ, જય જય રાધે કૃષ્ણ(૨)

જશોદા કહેતાં માતાજીને, બાબા કહેતાં નંદ,

રાસ રચાવે યમુના તટ પર, રાધાજીને સંગ,

બોલો રાધે કૃષ્ણ, જય જય રાધે કૃષ્ણ(૨)

ગોકુળ કહેતાં ગોવર્ધનને, નાથે કાળો ભુજંગ,

વેણુ વાજે વનરાવનમાં, સુંદર કરી ત્રિભંગ,

બોલો રાધે કૃષ્ણ, જય જય રાધે કૃષ્ણ(૨)

“સાજ” કહેતાં મૃદંગ વાગે, થાપ દીધી બુલંદ,

રાધે રાધે રટણ કરતાં, મૂક્તિનો આનંદ,

બોલો રાધે કૃષ્ણ, જય જય રાધે કૃષ્ણ(૨)

 “સાજ” મેવાડા

Read Full Post »

82-કાનો ગોકુળમાં ક્યારે આવશે?

મિત્રો,

આખરે મારો કાનો રિઝ્યો, મારા ઉપર! એના પ્રેમના સંકેતો મળ્યા, અને આ રચના થઈ છે. ગોકુળની એક વિરહઘેલી ગોપી કાનાના અંગત-સ્નેહીઓને, મિત્રોને અને અન્ય ગોપીઓને પૂછે છે, “કાનો ગોકુળમાં ક્યારે આવશે?” પણ અન્ય પણ કાનાની જવાની વેદનામાં સામે એવો જ પ્રશ્ન પૂછે છે. આખરે રાધાજી શ્રીમદ ભાગવતમાં શ્રી કૃષ્ણે કહેલી વાત દોહરાવે છે, કે કાનો હવે ભક્તોના પ્રેમ થકી તેમનો આર્તનાદ સાંભળીને આવશે. 

 

“કાનો ગોકુળ માં ક્યારે આવશે?”

નંદ જશોદાને એમજ પૂછી લીધું, “કાનો ગોકુળ માં ક્યારે આવશે?”

આશભરી આંખ લૂંછી જશોદાએ કીધું, “મારી ધેનુંને આવી ચરાવશે?”

 

ભેરુ ગોવાળને વાતોમાં પૂછી લીધું,  “કાનો ગોકુળ માં ક્યારે આવશે?”

અજવાળી રાતમાં યમુનાના તટ પર, “દડો રમવાને ક્યારે આવશે?”

 

ગાયોને ખડ દેતી ગોપીઓને પૂછી લીધું, “કાનો ગોકુળ માં ક્યારે આવશે?”

મહીડાં વલોવી શીંકે મેલ્યાં છે, “મટકી ફોડવાને ક્યારે આવશે?”

 

રાધાજી બાવરીને કોણ પૂછે સીધું, “કાનો ગોકુળ માં ક્યારે આવશે?”

કાનો વસ્યો છે મારા રુદિયામાં “સાજ”, “ભક્તોની આર્ત સુણી આવશે.”

 

“સાજ” ંમેવાડા

 

 

 

Read Full Post »

Wellcome, my friends

"Saaj" Mevada Presenting his composed song

 

It was a very hectic time for me in last two weeks. After superannuation from services at TCL, I had the honour to enjoy three farewell parties hosted by management, hospital staff and Kamdar sangh. Despite my shortcomings, all people appreciated my work as a surgeon and added appreciation and honour as a Lord Dwarikadish devotee. The Mangaldeep Satsang Mandal presented M. Rafi night on 31/08/2011. Specially for me, Bhajan Sandhya was organized on 1/08/2011, were most of my songs/bhajans were sung by Shr Sharadbhai Mehta, Karshan Ghadavi, Smt. Dakshaben Bhatt & myself and my wife Saroj. It was a memorable event & I deeply grateful to all. I specially thank, Shri Sharadbhai, Mukund, Kirtisinh, Shri Mahendrasinh Zala, Karshan Ghadavi and Radhika studio for excellent arrangements with dinner and videography. I was touched by their love & affection which I will cherish throughout my rest of the life.

Read Full Post »

81-મારે કાનાનું નામ નથી લેવું

મારે કાનાનું નામ નથી લેવું.

Dwarka from Reliance Road

મારે મીઠાપુર સાથે દ્વારિકાને છોડવાનો સમય નજીક છે ત્યારે અંતરમાં અવનવી વેદના અનુભવાય છે. ખાસતો મારા આરાધ્ય દેવાધિદેવ ભગવાન શ્રી દ્વારિકાધીશને, મારા કાળીયા ઠાકોરેને છોડીને દૂર વસવું પડશે એની વેદના ઘણી છે. આવા ભાવાવેશમાં આ રચના થઈ છે. આપ ભાવિકોને પણ ગમશે અને કંઈક અંશે થોડી વિરહ વેદના પણ અનુભવાય તો મારો પ્રયત્ન સફળ થયો છે. બાકી પ્રભુપ્રેમની સામે કશુંય ના ટકે, જોજનો દૂર રહીને પણ એ અનુભવાય.

મારે કાનાનું નામ નથી લેવું,

ભલે રાતભર જાગીને રોવું.

પ્રેમે પરખ્યોતો એને વૃજની કુંજમાં,

રાસ રમ્યો તો સાથે વેણુની ધૂનમાં,

નથી કાળીયા ઠાકોરને કંઈ કહેવું….મારે.

તારો હુંકમ હું આજ માથે ચડાવું,

દર્શનને કાજે હરિ ધામ તારે આવું,

અંતે સાગરમાં મારે સમાવું….મારે.

ચરણે પડીને ‘સાજ’ વિનવે છે નાથને,

નંદજીના લાલ ના છોડો મારા હાથને,

ભવભવના બંધન કેમ તોડું….મારા.

‘સાજ’ મેવાડા

૧૦મી જુલાઈ ૨૦૧૧.

 

Read Full Post »

79-હરિ-ઝૂરાપો

Landscape Water colour by Dr. P. A. Mevada

“ચિત્રલેખા” જૂન ૨૭, ૨૦૧૧ ના અંકમાં ‘ઝલક” કોલમ અંતર્ગત શ્રી સુરેશ દલાલનો લેખ, “ ઝૂરવું ગમે એવી મૌસમ” વાંચતાં અનુભવેલા ભાવ પ્રસ્તુત રચનામાં નિરૂપાયા છે. 

‘ઝુરવું’ એ ફક્ત ક્રિયાપદ નથી, કે ઝૂરાપો એ શબ્દજ નથી. તે એક સંપૂર્ણ વાક્ય છે, એક સંપૂર્ણ કવિતા છે, એ સંપૂર્ણ રીતે ભાવને ચિત્ર રૂપે આપણા માનસપટ ઉપર ઉપસાવે છે. 

‘હરિ-ઝૂરાપો’ એ હરિને મળવાની તિવ્ર ઉત્કંઠા છે. આને મેં ઝરણું થઈને વહેતી નદીનું રૂપ કલ્પ્યું છે. જેમ નદી કંઈ કેટલાય અવરોધોને (સુખ-દુઃખને), પાર કરતી સાગરમાં ભળી જાય છે એમ હરિ મારા ઝૂરાપાને, મને અનંત સાગર રૂપે, પોતાનામાં એક અંગ (એકાંગ) કરી સમાવી લેશે. પછી મારુ અસ્તિત્વ નહીં રહે. 

હરિ-ઝૂરાપો

હરિ-ઝૂરાપો ઝરણું થઈને વહેતો,

ઝરણે ઝરણે જમુના થઈને,

વ્રજભૂમિમાં ફરતો….હરિ-ઝૂરાપો.

 

કાદવ આવે કંકર આવે,

ખિણ આવે કે પર્વત આવે,

અનંત ભણી ખળખળતો…. હરિ-ઝૂરાપો.

 

વિહંગ સૂરે રાગ છેડીને,

તરુવર ખડને કાંઠે ધરીને,

વનમાળીની વાતો…. હરિ-ઝૂરાપો.

 

મીન મગરને કછુઆ ભેળો,

નાવ ભરીને માનવ મેળો,

ધરણીધરને ગાતો…. હરિ-ઝૂરાપો.

 

હરિ-સાગર છે સ્વામી મારો,

ઊછળી કરશે સ્વાગત એવો,

‘સાજ’ એકાંગે મળતો…. હરિ-ઝૂરાપો.

‘સાજ’ મેવાડા

Read Full Post »

78-ભૂલ્યો તું….

મિત્રો,

આજે એક નવું કૃષ્ણગીત રચાયું છે તે જૂની વાતને નવા સ્વરુપે રજુ કરે છે. ગીત ગાઈએ તોજ એની મજા હોય છે, બાકી શબ્દો એકલાતો સામાન્ય લાગે, એ ઘણા ગીતોને આપણે સાંભળીએ ત્યારે સમજાય છે.

78-ભૂલ્યો તું….

ભૂલ્યો તું ગોકુળને ભૂલ્યો વૃંદાવન,

ભૂલ્યો તારી જશોદા માતને,

ગોકુળની ગલીઓને વૃજજન ભૂલ્યો તું,

ભૂલ્યો તું રાધાજીની પ્રિતને.

 

યમુનાને કાંઠે મારી મટુકી ફોડીને તું,

નટખટ બનીને તું હસતો,

આંખ્યું ઊલાળી તું પાંપણના પલકારે,

હૈયા સાંસરવો જઈ વસતો. ……ભૂલ્યો તું.

 

વેણુના નાદને અધરાતે સુણીને,

બા’વરી બનીને હું દોડતી,

કદંબના ઝાડ ઓથે સંતાઈ તું બેસતો,

કેમ તને શ્યામ તને ખોળતી? ……ભૂલ્યો તું.

 

પાવકસી ને’ડાની લાગેલી આગને,

ચરણે પડુ છુ શ્યામ ઠાર તું,

દ્વારિકાના નાથને વિનંતી “સાજ”ની,

કો’કવાર ગોકુળમાં આવ તું……ભૂલ્યો તું.

‘સાજ” મેવાડા

Read Full Post »

76-શ્યામ આવોને રમવા

યમુના ના તીરે રાધા અને ગોપીઓ ભેળી થઈને તેમના વ્હાલા શ્યામ-કનૈયાને રમવા(રાસ) બોલાવે છે. સૌ વસંતના વાયરામાં ફૂલોની સુગંધ સાથે કોયલ અને ઢેલડીના ટહૂંકા રૂપે સંદેશો મોકલે છે, કે શ્યામ હવે વ્હેલેરા આવો અમે તમારા મિલનનની આશાએ વ્યાકૂળ થયાં છીએ, ના આવો તો તમને અમારા સમ છે.

શ્યામ આવોને રમવા

રાધા ને ગોપીઓ, ટોળે મળી છે શ્યામ, આવોને રમવા,

ખીલી છે ચાંદની ને, વસંતી રાત શ્યામ, આવોને રમવા.

 

કોયલ ને મોરનીના, ટહૂકાના ગુંજથી,

ફોરમ ફૂલડાની લઈ, વાયરાના પુંજથી,

મેલ્યો સંદેશો તને, નંદજીના લાલ, શ્યામ, આવોને રમવા.

 

વેણુનો નાદ ધીરે, ધીરે છેડીને,

સંતાયો કા’ન ક્યાંક નજરૂ ચોરીને,

યમુનાને તીર સખી, જુએ છે વાટ, શ્યામ, આવોને રમવા.

 

સોગન દઈને ‘સાજ’ , વિનવે હરિને,

વે’લેરા આવો નાથ, વેણુ ધરીને,

મિલનની ઝંખનામાં, ખોયું છે ભાન, શ્યામ, આવોને રમવા.

ગીત – ‘સાજ’ મેવાડા,

રાગ – સારંગ

Read Full Post »