223 – Pachhu valine jovu nahi-પાછું વળીને જોવું નહીં
આગળ આગળ ચાલ્યા કરવું, પાછું વળીને જોવું નહીં,
નીર નદીના થઇ વિસ્તરવું, પાછું વળીને જોવું નહીં.
મંઝિલ તો છે ઊંચો પર્વત, કાંટાળી ત્યાં ખીણ હશે,
ઢાળ મળે ત્યાં ના ઊતરવું, પાછું વળીને જોવું નહીં.
હોય તમારો મારગ સાચો, ગાંધી જેવા માનવનો,
ખુદ્દારી રાખીને મરવું, પાછું વળીને જોવું નહીં.
ભસતા કૂતરા કરડે નહીં એ કહેવત ખોટી છે મિત્રો,
જાન બચાવીને સંચરવું, પાછું વળીને જોવું નહીં.
‘સાજ’ તમારો દોષ નથી કંઇ, દુનિયાની એ રીત હશે,
જેવા સાથે તેવા ઠરવું, પાછું વળીને જોવું નહીં.
‘સાજ’ મેવાડા 24/11/2018