202-Aalapshe-Gazal-Saaj-Mevada-
આલાપશે-ગઝલ
જીદ તારી જીવતરને બાળશે,
યાદ મારી રાતભર તડપાવશે,
સાંભળે છે આંખ આડા કાન દઇ,
વાત વાતે નામ મારું આવશે.
જો નિયમથી ના રમે તો દાવમાં,
આખરે તું જીતમાં પણ હારશે.
છોડ ઊખેડી ફરી રોપો નહીં,
એ સુકાશે કોણ આંસું સારશે?
મ્હેલમાં શણગાર તારા લાખના,
ભાલપરનો ડાઘ તો શરમાવશે.
ઘર કરે છે રેત ભીની છીપનું,
કાળ દરિયો સહેજમાં એ તાણશે.
‘સાજ’ જંતરમાં દરદને છેડ મા,
કોઇ શેણી સાંભળી આલાપશે.
-‘સાજ’ મેવાડા