171-Kalam Rakho-કલમ રાખો-ગઝલ

171-કલમ રાખો-ગઝલ

એ જ સાકી અને સનમ રાખો,

મયકદે પ્યાસની કલમ રાખો.

અંધને આંધળો કહો છો પણ,

બોલવામાં જરા શરમ રાખો.

આ સમાચારની નથી વાતો,

કેમ ચર્ચા કરી ગરમ રાખો?

ગેબનો પંથ છે ઘણો દુર્ગમ,

સાચવી સાચવી કદમ રાખો.

ના કહો કે નથી તમારું કોઇ,

‘સાજ’ના પ્રેમમાં પરમ રાખો.

-‘સાજ’ મેવાડા

 

Read Full Post »

170-દરિયો-ગઝલ-‘સાજ’ મેવાડા

     170-દરિયો–ગઝલ

ઘડીવાર આવી મળી જાય દરિયો,

પછી આંખ ભીની કરી જાય દરિયો.

ઉમળકો કરીને ધસી આવે મળવા,

કિનારેથી પાછો વળી જાય દરિયો.

હવે શંખ છીપો નથી વીણવાના,

ઘણીવાર મોતી ધરી જાય દરિયો.

ભલે સંત જેવો ઘણો શાંત છે પણ,

પવનને તકાજે છળી જાય દરિયો.

ઉદરમાં ભરેલી કોઇ આગ રાખી,

કહો ‘સાજ’ શાને બળી જાય દરિયો.

-‘સાજ’ મેવાડા

 

 

Read Full Post »