ખૂલી જશે – ગઝલ

• ગઝલ – યાદ પણ કરતા નથી.

વીતી ગયેલી મિત્રતાને યાદ પણ કરતા નથી,

ડાયરીમાંથી નામ મારું બાદ પણ કરતા નથી.

કાયમ સહન કર્યા કરે, જોહુકમીને સંબંધમાં,

તકરાર તો કરતા નથી, ફરિયાદ પણ કરતા નથી.

જીવી રહ્યા છે લોક સૌ, બંધુકધારી દેશમાં,

ડર મોતનો હરરોજ છે, પ્રતિવાદ પણ કરતા નથી.

સાચી હતી એ લાગણી ભૂલી ગયો છું એટલે,

સંબંધના દર્દો હવે નાશાદ પણ કરતા નથી.

તારી ગઝલમાં ‘સાજ’ એવું તે શું છે કે, શાયરો_

દેતા નથી જો દાદ તો પ્રતિપાદ પણ કરતા નથી.

• ‘સાજ’ મેવાડા

Read Full Post »

Samji Lo-સમજી લો

સમજી લો – ગઝલ

લૂંટી લેશે, દુનિયાદારી સમજી લો,

દુનિયા કેવી છે વેપારી સમજી લો.

જીવનભર રૂપિયા પાછળ દોટ લગાવે,

પડદા ઓથે કારોબારી સમજી લો.

રંક, દલિતો, મા બ્હેનોને ચૂંથી નાખે,

કોનું પીઠબળ, કોની યારી સમજી લો.

હાથ મિલાવી થોડા માટે મારી નાખે,

લાલચની છે મિત્રાચારી સમજી લો.

ભારતની આ બરબાદી કોના હાથે?

નોંધાવે છે જે નાદારી સમજી લો.

સૂરજને સંતાવાનો વારો આવ્યો,

આખી દુનિયા છે અંધારી સમજી લો.

જો કરશે ન્યાય આખર કુદરતની કોરટ,

‘સાજ’ પ્રભુનો છે આભારી સમજી લો.

• ‘સાજ’ મેવાડા

Read Full Post »

Nahi karu – નહિ કરુઁ – નઝમ

        આજની નઝમ

આવી શકે તો આવ હું લાચાર નહિ કરું,

આવે નહીં તો પણ ભલે તકરાર નહિ કરું.

કાયમ રહે છે યાદ હું ભૂલ્યો નથી કદી,

સપનામાં આવશે તો હું ઇનકાર નહિ કરું.

જાણી ગયા લોકો હવે મારી દીવાનગી,

છોડી તને બીજા કોઈને પ્યાર નહિ કરું.

દુશ્મન બનીને આવશે મારા વિરોધીઓ,

છૂપો રહીને પીઠ પાછળ વાર નહિ કરું.

જન્મો જનમની પ્રિત છે એવી ખબર મને,

તારા વગર હું સ્વર્ગનો સ્વીકાર નહિ કરું.

જેવા પ્રકારો વાદ્યના સૂરો નવા નવા,

હું ‘સાજ’ને નીચો ગણી વેપાર નહિ કરું.

• ‘સાજ’ મેવાડા

Read Full Post »

ખૂલી જશે – ગઝલ

મિત્રો, ઘણા સમય પછી નવી ગઝલ રજૂ કરું છું.    

    ખૂલી જશે – ગઝલ

બંધ મૂઠ્ઠી જે સમે ખૂલી જશે,

રેત જેવી લાગણી સરકી જશે.

ફૂલને ભમરો ડરાવે ના કદી,

સ્હેજ ચૂમી પ્રેમથી ઊડી જશે.

વેશ જીવનમાં ઘણા ભજ્વ્યા કરે,

રંક કે રાજા હતો ભૂલી જશે.

તાડ જેવો એટલે ઊંચો થયો,

વ્હેમ છે આકાશને આંબી જશે.

જન્મભરનો દોસ્ત મારો કૄષ્ણ છે,

હાથ ઝાલી મ્હેલમાં તેડી જશે.

‘સાજ’ તારો રાગિણીનો સાથ પણ,

નાદ અનહદ સાંભળી છૂટી જશે.

• ‘સાજ’ મેવાડા

Read Full Post »

251-Sury pan Ugi jashe-સૂર્ય પણ ઊગી જશે

251-Sury pan Ugi jashe-સૂર્ય પણ ઊગી જશે

રાત આ ચાલી જશે  સૂર્ય પણ ઊગી જશે,

એમ તારી યાદમાં જિંદગી વીતી જશે.

હોઠ પર આવે છતાં જો યોગ્ય શબ્દો ના મળે,

આંખમાં દેખાય છે, એને હ્રદય સમજી જશે.

સ્નેહ ભીની લાગણીના વૃક્ષને સિંચ્યા કરો,

ફૂલ ફળ તો આવશે ને બાગ પણ ખીલી જશે.

તાઢ તડકો મેઘ તાંડવ પાનખર હો, કે વસંત,

ઈશ્વરી ઘટમાળ માણે એજ તો જીવી જશે.

દર્દ આપે ઐજ તો આપશે એની દવા,

માનવીની આર્તનાદો શિવ પણ પૂછી જશે.

ચાલ, આગળ થા હવે, મંઝિલ થોડી દૂર છે,

છે મિલનની આશ બાકી, સૂર્ય તો ડૂબી જશે.

‘સાજ’ તારી વેદના જો પ્હોંચશે એના સુધી,

કૃષ્ણ તારી વાંસળીમાં પ્રાણને ફૂંકી જશે.

  -‘સાજ’ મેવાડા

Read Full Post »

250-To Pan-તો પણ

       250-To Pan-તો પણ

કટલાં વર્ષો ગયાં બેકાર તો પણ,

આપણે છોડ્યો નહીં અધિકાર, તો પણ.

કોઇ વાતે અન્ય પર વિશ્વાસ નો’તો,

ને થયા સંજોગના શિકાર તો પણ.

ના અહં છોડી શક્યા કે વેણ કડવા,

માફ કરતં ના થયો સ્વીકાર તો પણ.

અગ્નિ સાથે ધૃત છે, તો કોણ બચશે?

નાશ બંને, થાય એકાકાર તો પણ.

કેટલાં જોયાં હતાં ભેગા મળીને!

ને થયાં ઘણાં સપનાં સાકાર તો પણ.

જીંદગી એળે ગઇ લાચાર થઇને,

સોચ જૂદી ને હતા સંસ્કાર તો પણ.

‘સાજ’ તૂટ્યે તાલના પકડી શકો, ને-

ભર સભામાં થાય હાહાકાર તો પણ.

  -‘સાજ’ મેવાડા

Read Full Post »

249-Saval Karvano-સવાલ કરવાનો

249-Saval Karvano-સવાલ કરવાનો

અવનવા એ સવાલ કરવાનો,

ને સભામાં બબાલ કરવાનો.

શ્વાન જવો સ્વભાવ છે એનો,

મોંઢું ચાટીને વ્હાલ કરવાનો.

જે ભરે તગડું બીલ હોટલમાં,

રોડ પર ભાવ-તાલ કરવાનો.

દોસ્ત મારાં દરદને જાણે છે,

વૈદ થઇને ખયાલ કરવાનો.

એ હસીને વિદાય કરશે પણ,

આંસું ભીનો રુમાલ કરવાનો.

લાગણીને ખરીદશે લોકો,

રોકડી તો દલાલ કરવાનો.

પંચ પરમેશ્વર નથી આજે,

કોર્ટમાં જઇ નિકાલ કરવાનો.

સૂર સાથે સુમેળ સાધીને,

‘સાજ’ આજે કમાલ કરવાનો.

  -‘સાજ’ મેવાડા

Read Full Post »

248-Kaho to Shu Karu-કહો તો શું કરું?

248-Kaho to Shu Karu-કહો તો શું કરું?

મને ધરાર શોધવા કહો તો શું કરું?

તમારું નામ ઠામ પણ ન હો તો શું કરું?

હતા નજદીક, તે છતાં કદી મળ્યા નહીં,

હવે અસીમ વેદમા સહો તો શું કરું?

જનમ ધરી ધરી તમને હું શોધતો રહ્યો,

તમે હવે નકાબમાં રહો તો શું કરું?

સમયનું વ્હેણ જોઇને ડરી ગયા હશો,

તમે પ્રવાહ સાથ ના વહો તો શું કરું?

ન ‘સાજ’ને કહો, ન તાલ સાચવો,

ન રગને સહી શકો, કહો તો શું કરું?

  -‘સાજ’ મેવાડા

Read Full Post »

247-Saluni Sanj-સલુણી સાંજ

         247-Saluni Sanj-સલુણી સાંજ

સલુણી સાંજની રંગત હ્રદયનો આવકારો છે,

તમારી ચૂમવા પાની ઘણી લાગી કતારો છે.

ભરી ઉન્માદને શીતળ પવનની લ્હેરખી આવી,

જરા નજદીક આવો તો હુંફાળો શ્વાસ મારો છે.

નથી બાધા ભરો પ્યાલી સુરાહી ના રહે ખાલી,

ઉતાવળ ના કરો સાકી સમય થંભી જનારો છે.

જરા તું રાખ સંભાળી અમારી નાવને માંઝી,

મિલન થઇ જાય મઝધારે હવે તારો સહારો છે.

કહો તો ‘સાજ’ લઇઆવું તમે ગાઓ ગઝલ મારી,

જિવનની મોંજ માણીલો ભલે દુ:ખો હજારો છે.

   -‘સાજ’ મેવાડા

 

Read Full Post »

246-Samjavtan-Gazal

      246-Samjavtan-Gazal

        સમજાવતાં-ગઝલ

કેટલું થાકી જવાયું, જાતને સમજાવતાં,

વ્રક્ષ જેવું જીવવાની, વાતને સમજાવતાં.

સૂર્ય કાલે ઊગશે નક્કી હતું તો પણ મને,

વાર લાગી એક કાળી રાતને સમજાવતાં.

એ નદીને ખાળવામાં ઊછળીને શું કરે?

વીફર્યાં છે વાદળો દરિયા તને સમજાવતાં.

વેડફી શબ્દો ઘણા બોલ્યા કરું છું એટલે,

થાપ ખાધી મૌનની તાકાતને સમજાવતાં

મધ્ય સપ્તકમાં જ છે આ ‘સાજ’ના સૂરો બધા,

જિંદગી વીતી, તને આ સાતને સમજાવતાં.

            ‘સાજ’ મેવાડા

 

Read Full Post »