214 – Lagado Chho – લગાડો છો – ગઝલ
જખમ તો કયારના દીધા, મલમ આજે લગાડો છો!
ફરીથી લાગણી દિલની, હવે શાને જગાડો છો?
અમે વીણ્યા હતા કાંટા, તમારા પંથના કાયમ,
તમે બાવળ, અમારા આંગણામાં પણ, ઊગાડો છો.
સમય વીત્યો, ના આવશે પાછો, ખબર છે ને?
કરીને યાદ દુ:ખોને, હવે જીવન બગાડો છો.
ભલે દરકાર ના કરતા, છતાં નિદૅય થયા શાને?
નિમંત્રીને, સભામાંથી વિના કારણ ભગાડો છો.
અનેરાં ગીત ગાયાં છે, સુરીલા ‘સાજ’ની સાથે,
છતાંયે, રાગમાં સરગમ તમે ખોટી વગાડો છો.
-‘સાજ’ મેવાડા 25 July 2018