242-Darvakhat-Gazal
દરવખત-ગઝલ
કોઇ સામે નીકળે છે દરવખત,
કેમ છો પૂછી મળે છે દરવખત.
કોઇ કારણ મળતું નથી આ દર્દનું,
આ હ્રદય શાને બળે છે દરવખત?
ચાંદ તો છોડી ગયો છે ક્યારનો,
તોય સાગર ખળભળે છે દરવખત.
ઊંઘ તો વેરી બની તડપાવશે,
સાંજ યાદોમાં ઢળે છે દરવખત.
કોઇ પડછાયો બની પીછો કરે,
દ્વારથી પાછો વળે છે દરવખત.
હોય શબરી કે અહલ્યા આજપણ,
ક્યાં પ્રતીક્ષા ફળે છે દરવખત.
‘સાજ’ તારું કોણ છે જે દૂરથી,
સાદ તારો સાંભળે છે દરવખત.
-‘સાજ’ મેવાડા